【姐匙Talk】大大聲吹雞撐飛機場

【蘋果日報】喺演藝圈做咗四十幾年嘅女前輩「大大聲」，一向係性情中人，有啲乜嘢唔高興就會當面魚蝦蟹爆粗，試過唔少台前幕後都畀大大聲鬧到狗血淋頭，就算係圈中一啲老資歷嘅人，大大聲如果覺得唔妥當，都唔會畀面照鬧，所以唔少台前幕後，特別係後生一輩，同大大聲合作都會恭恭敬敬小心翼翼。
不過，呢個世界真係人夾人緣，入行只係短短兩年嘅靚妹仔「飛機場」，竟然好得大大聲歡心，佢痛錫飛機場嘅程度，仲緊要過自己親生女。話說早排大大聲同飛機場首次合作拍電視台節目，飛機場雖然經驗淺，不時NG食螺絲，兼且表情生硬，但因為口甜舌滑，所以氹得大大聲好開心。
動員拉票
大大聲唔單止當飛機場親生女咁錫，而且飛機場早排有份喺一個網上電影比賽提名獎項，大大聲為咗飛機場可以攞獎，竟然幫佢四出拉票，打咗好多電話叫自己電影圈嘅朋友支持飛機場，話呢個女仔好有潛質，係明日之星力捧得過。唔單止咁，大大聲甚至運用所有社交網渠道嚟幫飛機場拉票，包括叫朋友同fans投飛機場票，聽講單係大大聲一人之力，就幫飛機場拉咗五、六千票，仲多過飛機場班fans，可惜大大聲咁落力拉票都於事無補，飛機場最後都係輸咗。不過，飛機場有大大聲呢位咁有江湖地位嘅前輩睇住，對佢將來喺呢行發展肯定有好大幫助。
撰文：Jessie
本欄逢周五刊登
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。