復刻CD封面出事梅姐粉絲轟「咁樣對待一位巨星」

【蘋果日報】梅艷芳過咗身已經十五年，今年三月安樂電影公司決定今年中開拍《梅艷芳傳奇》，到時梅姐嘅fans又可以睇番梅姐嘅生平，而除咗電影之後，華星噚日都出咗梅姐嘅《經典專輯復刻系列》，但就有引嚟fans嘅不滿喇。
前日梅姐嘅Fans page「梅艷芳 Anita Mui」，就貼咗呢隻復刻CD嘅封面，仲圈住咗梅姐嘅兩隻手，到底咩事呢？呢隻《經典專輯復刻系列》就用咗當年梅姐《心債》黑膠唱片嘅封面，不過兩隻手嘅位置就拉長咗，所以梅姐嘅fans page「梅艷芳 Anita Mui」就話：「華星呀華星，你要賺錢都俾啲誠意好唔好？梅姐隻手乜嘢事呀？就咁拉長就求其拎去印，你都得㗎啦！」除咗呢隻碟，華星仲會推出張國榮、羅文等其他經典專輯復刻系列。
之後都有好多網民留言指「其實只要將成張相拉大D，就唔會有呢個事情發生。」、「幾舊水搵印刷公司印幾百張leaflet印到咁都唔收貨啦！咁樣去對待一位巨星？」
寰亞唱片回覆稱：「梅艷芳《心債》歐盟版CD推出後，發現封面設計上出現錯誤，立即進行更正並通知印刷廠重新印製正確的封面，預計下星期中完成，本公司會與發行公司為已購買錯誤封面的歌迷及消費者安排更換。本公司對此設計上產生的錯誤十分抱歉，不便之處，敬請見諒。」