陳健民：話畀政府聽人心不死

【蘋果日報】威權年代，沒有甚麼是理所當然的。兩年下來，港獨和自決派參政青年先後被DQ，佔中倡議人、中大社會學系副教授陳健民說，當六四集會被指違憲、連7.1遊行都被左報揚言要取締，「唔好以為遊行示威，香港幾十年都係咁，呢啲嘢可以隨時拎走」。即使不少人疲累、麻木了，面臨佔中九子案審訊的陳仍堅持行得一次得一次，「隨時出年冇得行呀」。面對牢獄，他不畏懼，只害怕連發聲的自由都失去。
轟警出口術威嚇市民
特首由689換成777，一年過去，陳認為上街的理由更強烈，「林鄭相對冇咁惹火，但實質上DQ案、告雨傘或魚蛋革命嘅案件，好多嘢推咗落法庭度，同港人少正面衝突，不過實際上政治空間一路收緊」。最近連遊行權利都受侵犯，連中途加入7.1遊行也被警方警告可能是非法集會。
陳健民批評警方出口術威嚇市民，「以前政府會尊重遊行示威權利，依家就盡量畀麻煩你，用最重方式檢控你」。將來會否連遊行都違法？有親建制媒體質疑7.1遊行違憲，「冇乜嘢可假定係應有嘅權利，以為有出版自由，但發生銅鑼灣書店事件；以為有言論自由，但原來講吓自決，連參選機會都冇，想將香港變成另一個新加坡」。
對於今年7.1遊行人數，陳不感樂觀，因不少人認為抗爭無果感沮喪，預期不會有數十萬人上街，「又唔會好少人，總有一班人唔會畀呢個情況沉淪落去，最少話畀政府聽，我哋人心不死」。他預料年輕人參與更少，因他們仍需時間去沉澱，「雨傘後有人認為要勇武，但呢種力量好快被消耗，因為成本高」。
陳相信年輕一代未必會因此被嚇怕，「呢一代生命會有好深烙印，佢哋聞過催淚彈、俾警棍打過，部份人可能會流失，但一定有部份人反思後會搵到條出路」。未受牢獄之苦摧毀的年輕人，未來或變得更強大，亦相信本土派如梁天琦或傳統泛民均會有反思，互相理解更多，「只要心不死，打咗落去力量，總有一日會走返出嚟」。
因佔中背負多項罪名的陳健民，數天前才從歐洲完成學術論壇回港，參加7.1遊行後，又飛返歐洲參與另一場論壇。他的朋友笑他儍，為遊行飛來飛去，他卻擔心明年無法參與，「出年7.1會點唔知，唔樂觀，所以行得一次得一次」。
陳對監牢生活早有心理準備，近年習慣不開冷氣生活，日前更嘗試睡地板，年過半百的他彷彿說得輕鬆，「要適應吓，OK嘅，係唔知坐幾耐」。唯一擔心家人的情緒，因「佛系」如周永康在牢中與家人見面後，情緒亦一度崩潰，「係要幫身邊人準備，自己準備咗幾年，既來之，則安之囉」。