【馮仁昭四圍超】雷莊兒背男友約會四眼男

【蘋果日報】港姐冠軍雷莊兒（Juliette）卸任在即，之前佢透露過卸任後會返加拿大發展，估唔到話口未完前兩日佢已經返咗加拿大，會合佢嗰位喺當地做醫生嘅男友，仲上載咗合照喺Ig放閃。不過Juliette未返加拿大之前，見到佢約咗一位四眼男喺中環食晏，Juliette見到對方就雞啄唔斷，其間Juliette仲手舞足蹈，表情誇張，仲擘大口咁講嘢，真情流露。入到食肆，食晏時間人多，但冇人認得呢位港姐冠軍。佢哋兩個並排而坐，到嘢食嚟度，Juliette仲相機食先。
欲拉手臂
兩個人食咗一粒鐘，離開時舖外嘅行人路有梯級，四眼男諗住伸手去拉Juliette手臂，但Juliette行得快，四眼男根本捉唔到佢。行咗一段路，四眼男應該趕住返工，就同Juliette分道揚鑣。
其實喺月初，Juliette已經被影到同外籍男約會，事後佢話係約咗一班舊同學去飲嘢，仲話男友都識外籍男，唔知今次呢位四眼男，佢男友又識唔識呢 撰文：馮仁昭