【網民hot talk】棄手推車撞人車尾牙醫車主耍冧：賠償我畀！

【蘋果日報】喺現今周街都係攝錄器材嘅年代，若要人不知，就真係除非己莫為喇！好似昨日咁，又多一個港人無品行為畀車cam拍低咗惹嚟公憤！有網民喺facebook上載咗一條車cam片，直擊兩個推住超市手推車嘅人喺荃灣灣景廣場地下車庫「棄車」過程，佢哋唔單止無交還手推車，仲一手推開架車，由佢撞埋其他停泊私家車車尾。條片放咗一晚，已經喺各大司機專頁瘋傳，吸咗幾千個「嬲嬲」，仲有人話要人肉起底個司機出嚟添。


上載呢條片嘅司機哥哥話，前日喺商場泊車個陣，見到有兩個人推住超市手推車行去一架凌志私家車旁邊，「見到架車仔喺架Pruis後面，就心諗咁無手尾嘅人都有，當時無留意到佢咁樣推埋去」。佢話返到屋企翻睇車cam，先見到嗰兩個人喺凌志車尾卸貨後，其中一個人坐咗上司機位等開車，另一個男人就先將手推車推去側邊，之後再大大力推多一下，手推車直隊去旁邊另外兩部白色私家車車尾，衝力大度手推車彈返轉頭添，但個男人眼尾都無望一下，坐上座駕揚長而去。


咁無責任心，難怪拍片嘅司機哥哥都要怒問一句：「你阿媽有無教你己所不欲勿施於人？」有網民為個兩架無辜被手推車撞尾嘅私家車車主不值，建議拍片嘅司機見義勇為攞住條片去報警，「告佢刑毀！」

根據查冊資料，呢個車牌「A1WS」凌志嘅車主姓汪，報稱地址係長沙灣汪才生牙醫診所。我哋打電話搵到汪牙醫，佢承認係架凌志嘅車主，但就未睇過條片、唔清楚發生咩事，前日係屋企人揸咗架車出去，「應該係我屋企人嚟嘅，如果佢真係做咗啲咁蠢嘅事，請私家車司機做個報價，如果架車要修理返，我哋願意負責嘅。」佢又話會攞住條片同屋企人講返件事，亦希望向受影響司機道歉，「係錯就係錯，唔可以錯講到變咗啱！」


【網民咁講】

Terry Wa Kin Li：唔識將心比己，啲人好pk，鬼唔望佢日日都比人整花架車冇仇報。


Tim Ho：希望佢下次出街有人放架手推車喺佢車頂。


Gary Ngan：告唔告得刑事毀壞？

Man Malteser：香港人，好正常，試吓調轉點?

Kosis Ko：呢啲仆街真係不能放過！自私都算仲要害人。


Alex Fok：用索帶索返手推車圍住佢。