政府IT總監不續約　稱與楊偉雄合作無間

【蘋果日報】政府去年底公佈《香港智慧城市藍圖》，「推手」之一的政府資訊科技總監楊德斌於本月底合約到期後，決定不再續約。他澄清指非如傳聞般與創科局局長楊偉雄合作不愉快，又以「合作無間」形容兩人關係。他希望用未來10年再做多一件事，「依家係有少少概念，咁前30年都離唔開科技，相信之後都係」；並寄語新任總監繼續推動香港智慧城市發展，並能與各界多溝通。
現年53歲的楊德斌表示，在決定續不續約時，想到「如果仲有一個最後階段，應該做啲乜，呢個問題我思考咗好耐」；又指「如果再續任多3年，到時56歲，其實想再做多啲新嘅發展，可能係時間上未必足夠」，笑言「依家做呢都仲有精力，哈哈，仲有多一個10年去做多一件事」，形容這是「difficult decision」。他稱，未來發展與科技有關，「睇返我前30年同科技係離唔開，相信自己都走唔甩」。
外界盛傳他不續約原因是與楊偉雄合作得不太開心，他回應指由創科局成立與局長合作至今，「可以用4個字形容，我哋係合作無間」；又指「如果部門想做一件事，冇政策局支持，其實係攞唔到資源，很多配合要局個邊撐我哋先得」，例如撥款做新項目、智慧藍圖等，「呢啲野局嘅主導性好強，好慶幸局對我哋提出嘅政策、措施都係非常非常支持」。
作為《智慧城市藍圖》「推手」之一，他坦言3年任內最難忘、具挑戰亦是製作這份智慧城市藍圖，「製作藍圖係喺OGCIO（政府資訊科技總監辦公室）最艱難工作」，因牽涉政府多個政策部門，過程富挑戰性和難度，「好短時間咁消化全球最好城市點樣做，有乜可借鏡、落地」。他透露下半年將有新措施增加，惟待政府適時公佈。
■記者張文鈴