陳凱琳生日食甜筒隔空冧嘉穎「1314520」

【蘋果日報】噚日係陳凱琳(Grace)嘅27歲生日，前日已經有人同佢一齊慶祝，Grace喺ig貼咗張閉上眼睛，手握插住蠟燭嘅甜筒嘅相，張相仲寫住1314'520(一生一世，我愛妳)。咁冧嘅說話唔知係咩邊個講？男友鄭嘉穎，還是爸爸、媽咪同弟弟呢？
Grace以英文留言﹕「每年生日切蛋糕都會好開心同興奮，但唔係因為擁有最大、最迷人嘅蛋糕......而係真正關心我嘅人點樣對待自己。每次吹蠟燭時，我只希望明年同一時間，同一個地方，我哋可以一齊慶祝！」
而壽星女噚日仲好勤力去做運動，約埋吳海昕一齊去健身室打卡，認真搏到盡！吳海昕喺IG貼相，見Grace穿上小背心，美好身段呼之欲出，好搶鏡！吳海昕留言：「又大一歲的傻妹有點不舒服，也堅持要來spinning出汗，毅力 x100000，love you so much！運動完的女孩都笑得特別燦爛！」而「少婦聯盟」成員龔嘉欣亦喺網上發文祝賀Grace：「Happy birthday to Grace! The most sweetest girl in the world，we love you！」而Grace噚日回覆傳媒時表示夜晚會同嘉穎一齊食飯慶祝，Grace一班老友都有表示，相信嘉穎都會預備驚喜畀女朋友。