小斌女Steven陳年寫真出土網民大嗌「回憶呀」

【蘋果日報】日前關智斌(Kenny)同張致恆(Steven張致恒)兩度上咗張敬軒個唱任嘉賓，全場尖叫已經係意料中事，亦有不少人大嗌「回憶返晒嚟！」結果就連Kenny本人都受到「感染」。前晚佢喺IG貼咗一系列寫真集美圖…03年嗰本《Boy'z2gether王子版》，部份於泰國取景，有半裸床照，兩男又玩下水咁。Kenny仲留言：「多謝你們最近也不停勾起我的回憶，所以突然想到從書櫃深處找回這一本寫真集#笑到我呢#當年點解會有勇氣咁做#兩個排骨仔#有人係曾經瘦過#當年係男子寫真銷量第一#因為係唯一一本#好人好姐邊個會去影呀#一定都係Mani吩咐#雄風pose加埋個咀一定要搵啲嘢咬#魚網衫#睡床半裸惺忪眼」Kenny嘅tag幽默程度同軒仔不相伯仲。有歌迷就留言：「我最近有聽返佢哋啲歌，真係後生時候嘅回憶」。