【接林敏驄棒】杜汶澤主持動真火　陳柏宇林奕匡對戰民間高手爭獎金

【蘋果日報】【特約報道】
杜汶澤繼主持ViuTV節目《走佬去台灣》真實、爆笑又令人感觸的場面引來極大迴響後，今次接棒林敏驄和梁漢文，主持全新一季《Good Night Show全民星戰》，節目搵嚟一班民間隱世高手同明星嘉賓互相較量，當中有花式跳繩世界冠軍、街頭健身王、飛鏢運動員、香港氣槍冠軍等，每個都身懷絕技，一同爭奪超過10萬蚊的獎金獎品。
作為明星嘉賓的陳柏宇平時斯斯文文，一玩遊戲就變長舌婦隊長，有冇佢份玩都多多嘢講，連林奕匡贏咗都話人玩得唔夠好，仲教人其實應該點玩。阿澤就搞笑咁話，「你生仔就大獲喇！個仔考一百分都會鬧佢寫得唔夠好！」到自己落場玩又冇信心轉駄話自己只係聽指令，真係神又佢鬼又係佢。
而梁祖堯、湯駿業兩位做完老闆就聯同另一位舞臺劇演員韋羅莎大玩遊戲，雖然佢哋輕鬆咁贏到張功能卡番嚟，但到揀民間高手時就冇咁好彩，第一個遊戲以為對方係佛系宅男，點知揀中世界冠軍做對手，嚇到佢地即時o晒嘴。