防守中堅：垃圾民族－梁栢堅

【蘋果日報】世界盃充滿娛樂性，因為有一樣永恆元素：估佢唔到，就如成功電影劇本，在「有冇搞錯」與「吹你唔脹」之間馳騁，過去一周，德國巴西阿根廷就如幫莊家及眼鏡商找數，大殺球迷，再看有報道指每逢爆冷，財務公司一定旺場，又一批年輕人誤墮債網，甚至命都輸埋，小弟睇到心寒，惟有借此多口提醒諸君：「賭場專收叻仔，有錢剩因為肴底」。
日球迷執垃圾贏盡掌聲
世界盃乃萬花筒，球場固然如戲，場外亦有趣味，就如當日哥倫比亞對日本，日本勝算原本不高，豈料三分鐘內對家送紅牌再送十二碼，士氣激增，以多一夫之力下，最後壓倒哥國，贏場好波亦爆個小冷，大家高興，除了某國媒體之外（覺得日本打多一人而贏得不光彩之類，倒瀉硫酸腐蝕地球，笑死人）。
東瀛球員固然光彩，但真正比賽，竟然是完場之後，在場日本球迷開始進攻，玩執垃圾。此舉雖然不是新鮮事，去屆日本人亦有事後清理之報道，但今次竟然有雪球效應：輸家哥倫比亞球迷反攻日本，一齊執垃圾，化敵為友。
一時之間，日本人小善即時全球洗版，型出國際，間接為兩年後東京奧運做個撞牆公關騷，執幾件垃圾可以到此境界，仲神奇過場波，就如《三國誌》中「夫用兵之道，攻心為上，攻城為下，心戰為上，兵戰為下」，某國再葡萄亦冇聲出（除非誣衊他們影響清潔工人就業機會），臣服。
還記得去年香港夏天，南區至離島一帶海岸，突然間有大量垃圾飄浮，導致海灘大量堆積污物，而絕大部份都是殘體字包裝膠袋及包裝，更甚者還有針筒，來自哪國呢啲嘢唔好提，而最值得一提的，就是有一班日本人專程過來香港（當然是自費）幫香港人執垃圾，他們是日本非牟利環保組織Open Earth的成員，發起人是沖繩32歲男生鈴木博將，此舉令全港人感動，香港人從來去日本都是吃喝消費，人家來我們家竟然做義工，慚愧。
莫道善小而不為，難怪日本球迷贏得「最佳客人」之稱號，相比某國輸出之惡客，骯亂嘈吵破壞再加惡相，不可同日而語。未來幾場日本賽事，相信傳媒焦點應該轉向放在執垃圾方面，希望此舉可以發揚光大至影響全球，乃人類之福也。