老樓周記：回流港客也搶樓

【蘋果日報】老樓在傳媒已30年，未見過樓市可以一口氣升足咁多年，有人話「老樓你out了，以前嗰套睇市已不適用！」但老樓抱學習態度，受教才會有進步。
記得在金融風暴後，將軍澳區一個以年輕人為客路的新樓盤，話許多20多歲年輕人入市，老樓問有冇咁多錢呀。即晚落區視察民情，這個通宵賣樓的新盤現場，當時真的是有很多後生仔帶埋上一輩買樓，除咗可以用盡發展商九成半按揭之外，還要爸爸媽媽籌旗先至上到車。這批被喻為「三十世代」的買家，反而在跌市中成為他日賺錢最多的一群。
又在2005年，在一個東涌賣的新盤時，售樓部老友記講，呢個盤突然多咗許多內地人買樓，不問價錢、不問按揭。老樓這時還半信半疑，即刻問其他樓盤有冇類同情況，問回來得知荃灣一個新盤也出現這些買家，特點是喜歡買新樓、海景及特色單位，發展下去便出現了天水圍栢慧豪廷一車車載內地客買樓的經典場面。
依家又係邊類客多呢？基本上走不漏內地客和上車客，但亦多境外回流客，出現了在外國居住多年的香港人，透過本身有自置客身份免加稅買樓，最主要因為是看到香港升極不停及海外投資賺到錢來一次資金回流，有些透過個人名義或合組基金名義買樓，如果這類賺了美金回流客真的大量回港投資，那麼香港就變成聯合部隊攻陷港樓了。
劉兆昌
資深地產傳媒人
http://HKLau.com
本欄逢周五刊出