【姐匙Talk】甜姐兒豪放妹暗戰爭上位

【蘋果日報】娛樂圈係勾心鬥角嘅最大戰場，我姐匙喺呢行咁多年，見盡好多藝人嘅真面目，有啲人簡直喺台下比台上更好戲，真係睇到我反白眼呀！
就攞擁有最多藝人嘅大台嚟講啦，好似同樣係選美出身嘅豪放妹同甜姐兒，雖然喺娛樂圈浸淫咗只係短短幾年，但兩位醒目女已經深明呢行生存之道，每次大台安排佢哋孖住出席活動，兩個人都表現得姊妹情深咁款，成功吸引記者注意爭取見報機會，有次佢哋喺節目合作表演歌舞之後，豪放妹仲喺記者面前賣口乖，大讚甜姐兒跳舞叻叻㖭。
背後唱衰
之不過，人後嘅豪放妹同甜姐兒其實鬥到七彩，因為兩個都正俾大台捧上位，為咗爭坐女主角嘅寶座，喺背後放暗戰係基本動作，話說甜姐兒有日開工同劇組吹水，有意無意踩豪放妹唔化妝個樣嚇死人，仲勁笑對方似足冇眉娘，工作人員先知佢哋實際上係面和心不和。
事關大台有成一百幾十位姐仔，但可以叫做一線花旦嘅阿姐級，十隻手指數都數唔晒，其他排喺後面嘅二、三、四、五、六、七、八線，加埋每年選美出身嘅XX小姐，雖然質素一蟹不如一蟹，但喺僧多粥少之下，想上位真係唔容易，分分鐘由十八、二十二等到變大媽，人老珠黃都未上到位……陰功！所以，有人為咗爭上位，真係虛偽到爆囉！
撰文：Jessie
本欄逢周五刊出
姐匙Talk
我姐匙縱橫歌影視幕後，咁多年嚟冷眼旁觀，娛樂圈大小事都走唔過我雙眼，真係頂唔順要爆啦！歡迎大家嚟剝花生。