【馮仁昭四圍超】同老公撞車　王君馨傷胸頸

【蘋果日報】王君馨同老公Daniel噚日不幸遇上交通意外，佢喺Ig圖文並茂，兼拍埋片講述事發經過，佢話原本打算趁父親節約爸爸去銅鑼灣食飯，揸車行經東區走廊時，因為前面架的士突然急停，雖然自己架車冇撞到前面架車，但後面架私家車就煞掣唔切，搞到兩車相撞。結果君馨同老公都整親條頸，要上救護車送入急症室接受治療，佢話：「胸部頸部同背脊有少少chok親，老公個頸同埋頭有少少chok親。之後落車畀口供，影到撞到我哋嗰架車炒到咁，好彩冇人大受傷。」
首次坐救護車
原來君馨仲係第一次坐真正嘅救護車，非常好奇，問長問短。15分鐘後被送到灣仔律敦治醫院，一個鐘頭之內，完成睇醫生寫報告，落口供，最後攞埋藥離開。醫生話佢啲骨同神經線都冇事，應該係拉傷肌肉，休息幾日就會好番。同時，君馨好感激警察、救護人員同醫生、護士嘅照顧，令佢同老公都好放心，雖然係有啲嚇親，但慶幸仍然活着。最可惜同爸爸餐父親節飯最後告吹，有下次先再食過。
撰文：馮仁昭