【一周必看】點止碧咸冇份咁簡單　世盃最強懶人包連賽程表

【蘋果日報】【足動世盃】點止碧咸冇份咁簡單　世盃最強懶人包連賽程表
四年一度世盃今日就正式開鑼喇！就算你鍾唔鍾意睇波，都一定避唔開呢次強烈嘅世盃氣氛，如果你係女士們，而你男朋友又係100%嘅球迷，就更加要了解我哋提供嘅懶人包時間表。最緊要嘅係，今年世界盃64場比賽全程由Now TV現場直播，Viu TV亦會直播19場，球迷記得留意喇！
至於以下係我哋精心度過、只係Level1嘅基本入學問題，如果記熟晒，加埋我哋懶人包時間表，嚟緊一個月，仲唔做個醒目嘅女球迷！
Q：世界盃幾多年舉辦一次?
A：4年一次
Q：曼聯、利物浦同皇家馬德里有冇份?
A：冇，因為曼聯係球會，世界盃係國家隊嘅比賽，只會有巴西、英格蘭同德國等國家。
Q：碧咸去咗邊？點解英格蘭今屆世盃好似冇佢份嘅？
A：碧咸已經喺2013年退咗休，即係唔再踢波收山喇，所以佢會同我哋一樣坐定定喺屋企睇世界盃。
Q：知唔知世盃踢幾多日？幾時完？
A：以往每屆世盃都係差唔多踢一個月，今屆由6月14號開始打揭幕戰，總共踢64場比賽，踢到7月15日嘅決賽先完。
Q：知唔知邊個國家捧走世盃最多次?
A：巴西，總共5次。
Q：知唔知咩係12碼?
A：比賽入面，如果防守球員喺禁區入面踢低或侵犯對方進攻球員，就會判罰攻方獲得12碼，攻方會派一位球員處理，將個波擺喺指定位置主射，而防守一方就只有龍門可以撲救。
Q：知唔知一場比賽有幾多個球證?
A：4個。
Q：知唔知一場世界盃比賽踢幾耐？
A：分組賽就踢90分鐘，如果去到淘汰賽階段，90分鐘未定勝負，就要踢30分鐘加時，再定唔到勝負，就要透過互射12碼嚟分勝負。
Q：今年世盃喺邊度舉辦?
A：俄羅斯。
Q：點解啲比賽多數喺夜晚先踢？
A：因為我哋香港雖然係夜晚甚至深夜，但俄羅斯時間只係下晝或者傍晚。
Q：今屆又有邊幾隊有機會贏世盃呢？
A：巴西、德國、法國同阿根廷都係大熱門，西班牙本身都係，但賽前突然炒咗教練影響軍心，可能影響爭冠機會。
Q：咁意大利同荷蘭呢？好似佢哋都係足球強國喎？
A：意大利同荷蘭好不幸喺外圍賽已經出咗局，佢哋同我哋偉大嘅祖國一樣，都唔會出現喺今屆世盃。
Q：咁咩叫越位？
A：......