中港商販狂推　稱播足64場　「神器」睇波　隨時死機兼犯法

【蘋果日報】【2018世界盃】
【蘋果日報】球迷期待四年的世界盃還有三日便到了！不少人為免費睇波各出奇謀，中港兩地均有商販趁機賺錢，推出五花八門的「睇波神器」，包括電視盒子、解碼器、直播接收器、收月費專享頻道，儘管接收方法不同，各商家均拍心口稱可以盡看64場世界盃賽事直播；不過有已買相關盒子的市民，上月底卻無法收看歐聯決賽，擔心盒子再失靈會錯過今屆世界盃賽事；而有法律界人士更警告，世界盃賽事有版權，非法盜看或觸犯《版權條例》。
記者：黃學潤　林熊　廖怡德
在深水埗鴨寮街視察，《蘋果》記者於一個專賣各種電視天線的檔口，發現有檔主展示一批Hibox，還邊硬銷邊講解：「呢個盒唔使解碼，你駁咗上網就得喇，可以睇世界各地嘅體育頻道，佢哋世界盃都有直播，到時㩒入去睇就得。」當記者問這是否違法？檔主強調：「犯乜法？呢部唔係解碼器係盒子，係上網用嘅，唔係解碼器盜睇頻道。」
球迷呻無歐聯決賽睇
在同區黃金商場亦有不少店舖有出售不同牌子電視盒子，有女檔主表示：「呢啲盒子睇世界盃全部冇問題，如果呢個台睇唔到，可以轉去第二個台，總之一定包你可以睇到世界盃。」
不過，市民梁先生早前以近900元購買一個號稱可收看今屆世界盃賽事的機頂盒，他指之前看NBA亦無事，可是上月底歐聯決賽夜卻無法轉播，不停㩒掣轉台始終找不到一個台可觀看賽事，他擔心會錯過世盃賽事。
至於深圳華強北的賽格電子市場及附近出售電子產品的商場，其中一款售價600元人民幣的「海外專用」直播神器，店主聲稱可以收看香港翡翠台、明珠台及大陸海外直播電視節目，並可看到同有廣東話旁述的廣東及澳門體育台世界盃節目，更指在香港及海外接收更快更穩定。有商販更吹噓可透過衞星觀看now TV頻道。
香港資訊科技商會榮譽會長方保僑指出，機頂盒收集世界各地，甚至本港收費電視台或免費電視台節目，號稱可收看數百條頻道，主要透過OTT（Over-the-Top）影音串流形式播放，因透過外國電視頻道收看，同一時間大批人登入頻道可致伺服器超負荷，輕則「畫面窒吓窒吓斷線」，重則隨時死機。