【馮仁昭四圍超】過氣夫妻做番朋友彭文堅、陳祉妤茶記撐枱腳

【蘋果日報】現年49歲、87年參加過超級新星選舉嘅彭文堅，離開娛樂圈後轉行從商，09年曾經同模特兒陳祉妤（Balia）結婚，不過結婚唔夠三年，因男方偷食而離婚。原來佢哋離婚多年依然做到朋友，日前仲孖住去大坑食茶記。
狂煲電話粥
當日大約中午，彭文堅同Balia揀咗近路口位置坐，方便睇住泊喺街邊嘅座駕。其間，彭文堅不時行出街講電話煲煙，一餐飯行出行入四次，搞到Balia有啲無奈，玩電話解悶。佢哋食咗半粒鐘離開，由女方埋單，之後各自攞名貴跑車走人，臨上車道別時，Balia忽然提彭文堅唔好將啲衫擺入洗衣機洗，相當關心對方生活瑣事。
對於前夫食飯掛住煲電話，Balia話：「朋友會恃熟賣熟，好似我同班女性朋友出嚟，有時大家都係忙玩電話。」之前Balia曾透露已有穩定男友，問佢知唔知前夫感情狀況，佢話冇特別問。講到佢哋分手依然好關係，佢就解釋：「唔係有乜唔好嘢upset到大家，分開咗都做到朋友。」
撰文：馮仁昭