中環在線：新濠小股東叫小賭王包船飛請去澳門

【蘋果日報】新濠國際（200）主席何猷龍新酒店Morpheus下星期開幕，但小股東們一於未出發先興奮，響股東會上問小賭王可唔可以包埋船飛，請佢哋去參觀一吓，話要體驗過先感受到新酒店咁話。
平時聽股東呻點心、小禮品就聽得多，但話要包埋船飛請股東體驗集團新項目又真係少啲，呢位股東更妙想天開，問新濠旗下新濠博亞會唔會諗吓去日本上市，話晒日本似乎開賭有望。
呢位股東咁chur，好在何猷龍都答得唔錯，話新酒店仲有工程進行中，依家安排未免太趕，遲吓啦，集團響澳門未來有新項目，就考慮安排股東去睇；至於日本喇喎，八字未有一撇，暫時新濠都未有赴日本上市打算。
至於賭王何鴻燊下周澳博（880）股東會後正式退任主席，何猷龍就話爸爸「身體ok吖，多謝關心」，而他就唔會出席澳博股東會。
李華華
LiWaWa@AppleDaily.com