中環在線：羅啟瑞清純女兒首登場辦英語教育軟件

【蘋果日報】鷹君（041）大股東羅氏家族第三代真係多靚女喎，繼大家經常見到嘅羅寶文（世城系羅旭瑞女兒）、羅寶瑜（瑞安系羅康瑞女兒），噚日鷹君爭產案去到第6日，六子羅啟瑞長女羅寶瑋（Natalie）亦有現身，樣貌清純標緻。
羅啟瑞育有兩子兩女，聽講羅寶瑋今年26歲左右，同爸爸一樣喺美國哥倫比亞大學讀書。根據網上資料，羅寶瑋喺哥倫比亞大學修讀哲學，對教育事業十分有興趣，讀大學期間，就曾經以教育實習生身份喺聯合國兒童基金會北京分部工作過。
美國畢業後，羅寶瑋返香港攻讀香港大學嘅教育學碩士課程，再去香港弘立書院做中學英語老師。不過佢家陣應該無教書，而係做緊兒童英語學習軟件公司Kadho嘅全球發展副總裁和學習總監。一句講晒，又靚女，又有愛心搞教育，富三代嚟講都算特別。
李華華
LiWaWa@AppleDaily.com