【一周必看】不忿被抄牌　肚痛姐發難「問候」兩警

【蘋果日報】揸揸吓車人有三急，你會點處理？上水呢位阿姐就選擇泊路邊，結果要食「牛肉乾」，可能肚痛搞到躁底，阿姐當街大罵警員，睇嚟連去廁所都唔記得咗！
「我肚痛呀！」由讀者歐小姐提供嘅片段可以聽到，一位着住粉紅色衫嘅長髮阿姐，企喺部白色私家車前，大大聲同兩個阿Sir理論，「你咪抄囉！」「X街！」「X你老母！」雖然阿姐話肚痛，但明顯冇對佢語言能力構成影響，中氣十足。歐小姐遠在幾十米以外嘅龍豐廣場，都清楚錄到阿姐點鬧警員。但兩個阿Sir嘅對話就聽唔清楚，你有你鬧，最終阿Sir當然跟規矩抄牌啦！
「成條街都聽到佢把聲！」歐小姐話，阿姐停車嘅地方係巴士站，屬於禁區，平時都常有貨車上落貨，對居民造成不便。歐小姐話其實嗰頭離最近嘅公廁，都隔咗一條馬路，唔明阿姐點解要將架車停喺度。