現身旺角派世盃任睇pass李克勤睇好邊隊：尼馬冇事就巴西

【蘋果日報】李克勤、周秀娜昨日喺旺角出席The Club派發睇世界盃「一日通行證」活動，DJ少爺占同當奴就擔任活動司儀，大會亦俾咗張pass克勤，等佢睇晒世界盃賽事，克勤對英格蘭有情意結，一定會支持，至於其他球賽，佢就支持有尼馬嘅巴西：「今屆好多隊都好有實力，如果尼馬冇事，就支持巴西，如果佢有事，就返屋瞓啦。」眾人又喺旺角行人專用區舉行露天玩遊戲，雖然兩旁仍然有人大大聲唱歌，但無阻佢哋活動，克勤抽現場觀眾出嚟玩完遊戲，再送出一日通行證俾玩家，仲有佢嘅簽名嘅足球，而娜姐就喺隔籬吶喊助威。
克勤喺訪問時講到：「自己廿幾年前都有去美國親身去睇，當時仲有洪金寶，上屆同外父同爸爸都有去巴西睇，如果今次要睇，就一定要帶埋囝囝去。」不過佢就包底話明唔會去，因為爸爸都80歲，阿仔都得8歲，驚佢哋走失。
至於今屆世界盃主題曲，由譚詠麟負責，克勤都有份唱，仲會喺ViuTV播，問到佢驚唔驚TVB會嬲？佢話：「唔知喎，其實係校長打俾我叫我幫手唱。都有問過老闆楊受成，本來話唔同公司所以唔得，但因為校長開口，所以就破例，盡量配合。」佢又話唔覺有問題：「個世界咩都撈埋一齊，唔覺有問題，其實跨唱片公司一齊做嘢係好事，呢件係盛事。」首歌之前被網民批評曲風古老，記者未問完，克勤已經搶答：「唔關我事，最緊要開心氣氛好，氣氛重要就係一切。」