李柱銘做老爺阿囝大讚老婆package正

【蘋果日報】噚日朝唔少政商界中人雲集堅道主教座堂，見證民主黨創黨主席「馬丁」李柱銘囝囝李祖詒（Joseph），同莎莎老闆郭少明嘅細女郭詩雅（Kitty）拉埋天窗，馬丁今朝同太太一早到場後，被問到心情如何時，就微笑指指個天，話：「同個天氣咁」，但就無答是否心急抱孫。
唔少政圈同法律界名人到有到場，包括前特首「煲呔曾」曾蔭權同太太，前政務司司長陳方安生同大女、香港高等法院原訟法庭法官薜偉成、截取通訊及監察事務專員石輝、前香港終審法院常任法官包致金、資深大律師駱應淦同潘熙、東亞銀行主席李國寶等。民主黨唔少成員亦有現身，包括大律師吳思諾同老公、涂謹申、單仲偕夫婦等，其中涂謹申更帶咗神秘禮物送畀一對新人。建制派方面，則有自由黨榮譽主席周梁淑怡到場。
涂謹申其後透露，自己送咗本講「執嘢」的書畀新人，其後笑住補充話本書係講「執屋」喎。
一向低調的新郎李祖詒，婚禮儀式後罕有受訪，被問到有無計劃讓馬丁抱孫時，祖詒話會順其自然，透露由於現時都忙，所以會秋天先去歐洲度蜜月。問到兩人相識經過，祖詒就話係朋友介紹，雙方拍咗拖三年幾後即決定結婚。談到妻子的優點時，祖詒就答：「佢所有都係優點，佢個package，即係佢個人，由一出世到最終，佢係一個好好的人、好善良，我好欣賞佢」，之後一對新人就同親朋戚友去咗中環香港會午宴，煲呔曾都繼續畀面出席。