會師中環：老海鮮最忌過份自信

【蘋果日報】近排，有位連「Google Doc」係咩都唔知嘅地獄交官，係報章上狠狠咁大罵時下年輕人驕生慣養。老實說，該文章看得我一頭霧水，她提出如「Google Doc識Share有咩咁巴閉」這個水平的問題，相信連Google創辦人都解答唔到。不過更難明嘅係，到底佢哪兒來的自信去批評一樣自己從來都冇用過嘅工具呢？
過度自信係上一輩老海鮮嘅通病，正如有人叫自己做「叻X」一樣，我到依家都唔明點解佢唔會面紅，唔通被人如此抬舉都唔覺尷尬嗎？當然，佢係唔會覺得自己有問題，因為佢認為自己真係叻嘛。至於點為之叻？香港其實只有一個絕對標準：搵到錢！這個標準實在置老海鮮於不敗之地，佢哋比年輕人做多幾十年嘢，有錢過大部份後生仔都係好正常。結果，佢哋會好自然得出一個結論，就係我比後生仔有錢，所以我更叻！
古語有云「莫欺少年窮」，這句話現在已經過時，應改為「寧欺少年窮」，而且是往死裏打嗰隻欺負，正如我都聽過有老闆講話「個Junior人工咁底，睇死佢都要喺公司做多幾年等加人工」。不過世事冇絕對，呢個世界總會有一些不會過度自信嘅上一輩，例如李嘉城就從不自稱為「超人」，又不會問Deepmind創辦人AlphaGo有咩咁巴閉，可見真正有錢之士都係謙虛得多，聲大大嗰啲十之八九都係裝腔作勢。
神仙丁
《審計搵丁》負責人
http://facebook.com/AuditSlave/
本欄逢周五刊出