中環在線：I.T沈嘉偉見記者變小學生

【蘋果日報】潮牌I.T（999）老闆沈嘉偉出名唔鍾意講嘢，不過每逢公司業績會，都會見到佢乖乖坐定定聽記者問問題。點解話係「聽記者問問題呢」？查實華華真係無用錯形容詞，事關沈生左右手（投資者關係及企業融資總監方衛斌、I.T中國行政總裁陳惠軍）太得力，上至公司盤數，下至營運策略，好多時都係由佢哋代答晒。
噚日公司公佈舊年業績，純利按年大升三成七，表現算唔錯，不過沈嘉偉全程好似小學生驚被老師叫名問問題咁，頭耷耷靜英英坐喺度。不過唔好誤會，其實沈嘉偉都幾nice嘅，完咗答問環節，當記者主動行埋去問問題，沈生都會答吓㗎。
李華華
LiWaWa@AppleDaily.com