打機輸俾方大同「地獄廚神」薛凱琪：煮嘢食我贏

【蘋果日報】薛凱琪(Fiona)昨晚到太平行出席「CHANEL Beauty舉行COCO GAME CENTER」活動，Fiona就話好開心能夠出席呢個活動，問到係咪呢個品牌嘅粉絲或收藏品牌嘅物品？佢就話：「我反而鍾意儲鞋，係一個鞋癡，我收藏咗幾百對鞋呀，對於選鞋特別花心思同心機去揀，尤其是成日要着高踭鞋去跳舞，所以一定要揀一對好嘅鞋，如果唔係就會傷到條腰，自己試着一啲好靚但唔舒服嘅鞋，反而着到自己對腳損晒，所以有咁多鞋搬屋、裝修時，都會叫設計師幫我設計一間房嚟擺鞋，o依家屋企都有一間房放我幾百對鞋。」
現場設有一啲遊戲機供出席者玩，Fiona就話頭先都有同方大同試玩打機，係一個彈琴嘅Game，佢話：「當時我好認真咁玩，但係都要輸俾大同十萬分，估唔到現實生活彈琴叻，打機彈琴都係咁叻，如果係煮嘢食，可能就會到我贏番喇！」記者即時取笑Fiona參加《美女廚房》時係輸咗，仲有地獄廚神封號，佢聽到之後即話：「人會變㗎嘛，(你可以參加新一輯《美女廚房》喎？)Hey，今日唔講呢啲嘢啦！都係講番活動嘢先。」之後Fiona就轉移話題，話自己兒時都立志想自擁有一個時裝品牌，所以COCO CHANEL都係佢最喜愛嘅牌子。