【網民hot talk】「投訴之刀」再出鞘　阿婆靜靜耍太極都藐

【蘋果日報】瑞士洛桑國際管理發展學院發表「全球競爭力年報」，香港排名由舊年第一跌咗落第二，不過有樣嘢香港認第二冇人敢認第一，就係投訴喇！作為投訴之都嘅香港，要兩個茶包收兩杯茶錢要投訴，外傭放假冇地方去坐喺街又要投訴，就嚟連阿婆都投訴埋一份，冇錯，今次真係投訴阿婆，但今次真係婆說婆有理，個個都撐阿婆。
話說有個中年大叔朝早喺黃大仙竹園邨拍咗條片，片主揸住電話喺兩個球場中間嘅通道穿插，而一班耍緊太極嘅婆婆就悠然自得喺度耍緊太極，但大叔就好不滿，話呢條路係好多人出入嘅必經之路，不過有街坊就話其實果條路一般好少人行，通常只係公公婆婆散步嘅地方嚟，況且果條路闊過西隧，就算婆婆企正中間，只要兜一兜就過到，唔會因為阿婆企中間而完全行唔到，加上靜英英耍太極冇嘈住街坊，所以個個都撐阿婆。