蔡志忠：樓市爆煲唔易

【蘋果日報】新地（016）啟德地王效應，樓價續破頂，人稱「亞洲蔡」的亞洲地產董事總經理蔡志忠一語中的，直言：「新地買地，香港人就驚！」所指的驚，是驚買不到樓，故追價入市。
指港資買地刺激入市
蔡志忠解釋：「海航買地時，作為中資機構，坊間一般睇法係托市。淡友覺得托市，樓市遲早爆煲，中資先會出咁高價。當時有一部份人半信半疑，樓價會升，因為托市、中資、大陸佬吖嘛！相隔兩年，依家新地嚟買，你驚唔驚呀？未買樓嘅人驚唔驚先，想買樓嘅人驚唔驚先？初初懷疑，依家變成現實。」
他續說：「如果今日呢塊地係中資買，好多人仲係唔信，但依家新地呀……新地係港資，唔會咁儍。中資買，啲人覺得托市，唔識嘢。但依家係港資，仲係龍頭，大家就唔會懷疑。但呢個唔係好事。樓市升得太急，大家唔鍾意。但冇辦法，市場係新樓話事，你係發展商，仲唔賺到盡呀。」
他認為本港樓市扭曲，「樓價仲會再創新高，唔好話嚇人，但我又唔想見到咁。坦白講，雖然我係投資者，但我都唔想見到樓價一路創新高，咁唔係太好。但事實係一路創新高，市場係扭曲。（錢從何來？）複式購買力，有父幹、有爺幹，根住又量寬，錢流向民間」；再者金管局收緊銀行按揭，目前入市買家實力雄厚，借貸成本低，「全部借四、五成，點爆箒？樓市要爆煲唔容易，唯一希望係快啲加息，加多啲、加多啲，咁樓價咪有壓力囉。但美國唔容易加息，因為歐洲、日本、中國都量寬，單單美國點收水呀？所以（樓價下跌）都係會慢囉」。