中環在線：波哥寸陳德霖唔夠透明度

【蘋果日報】金管局總裁陳德霖噚日拉隊上立法會財經事務委員會滙報，其中一個焦點係外滙基金首季表現，不過佢個powerpoint就得今年首季（Q1）數據，冇舊年Q1業績，保險界立法會議員陳健波就有啲微言，覺得難按年比較喎。
波哥話：「我想你下一次個表，唔止列出2018年Q1（首季），仲要出理2017年、2016年Q1，方便比較」。陳總回覆話，基金唔係好似航空公司咁，比較多季節性因素，外滙基金表現就非常受市場價格影響。似乎係暗示季度太短，按年比較冇意思喎。
波哥就繼續回應，「列埋舊年Q1，新聞界比較都容易啲吖，如果普通公司，老細一定唔畀咁做，不過都知道你唔係普通公司嘅，但高透明度點都好啲。」估唔到呢個話題都講咗幾分鐘，真係要睇吓嚟緊金管局會唔會虛心納諫。
李華華
LiWaWa@AppleDaily.com