職場慧眼：職場怨婦的牢騷

【蘋果日報】「Son姐，我唔明點解既然咁唔鍾意份工，老闆又賤格又剝削，上司又廢又無能，同事又衰又卸膊，下屬冇腦又射波，點解咁都唔走？係咁日日四圍搵人講是非，投訴呢樣投訴嗰樣，喺呢個面前數嗰個，係嗰個面前數呢個，佢唔係以為我哋唔講嘢㗎係嘛？聽到佢把聲都已經煩死，真係好煩，絕對影響我哋返工做嘢嘅心情。我更加唔明點解老闆咁都忍佢，唔通老臣子有免死金牌？我哋同事都有經常討論，但係就冇結論，想問下Son姐你有何高見？」
看你出口成文，應該是個牙尖嘴利轉數快的人物，為何這麼簡單的事你想不通？從一個職場怨婦（唔好問點解，我直覺呢個怨婦係男人）的存在，很大程度可以反映你老闆是一個怎麼樣的人。
明知公司上下怨聲載道，明知對工作沒有貢獻，明知無所事事專搞是非，老闆還是選擇包容，離不開兩大理由。一就是真正念舊，生性懦弱軟弱怕煩，逃避作為老闆要解決面對問題的責任。二就是根本故意包容縱容，要令公司上下不和諧，最好同事們鬼打鬼，爭住打小報告用是非做人情，因為知道老闆最鍾意聽。想深一層，可能還有多一個理由，既然怨婦的存在有好一段歷史，會不會是黃馬褂，或者前朝遺留下來的遺物，所以老闆動不得？以上幾個理由可以同時存在，你要好好想想自己究竟值不值得繼續在這裏存在。
我擔心的不是那位怨婦，是你們不知不覺間被潛移默化成了怨婦不自知。這位仁兄有甚麼值得你們日日討論的空間和價值？因是為你們工作太過清閒，還是實在經已忍無可忍，都是警號。你必須醒覺，為自己的未來，此地應不應該久留作打算。
職場怨婦何其多，做好自己最實際。
張慧敏