【蘋果日報】母親節是「媽媽大曬」的日子，當做仔女的以為媽媽可以安心放一天大假，事實上無論我們今年幾多歲、處於哪一個人生階段，在媽媽眼中卻是個永恆的小孩。《蘋果》找來5個小孩的母親，年齡介乎30至92歲，剖白「養兒一百歲、長憂九十九」的甜蜜負擔，即使是媽媽日，她們卻甘願把願望獻給自己的骨肉：「只要你快樂，我就快樂」。
一）Sarah育有4歲女兒Scarlett，4個月後再迎接第2個小生命。她從前就夢想25歲結婚、26歲生子，最後人生與理想幾乎100%接軌，但長女來得意外，曾讓當年26歲的她措手不及：「咁後生有少少擔心，我（到底）ready未？」
Sarah說，以前常常幻想與寶寶有很多溫馨畫面，「但做落又好激氣喎！大大吓駁嘴；有時三姑六婆又搭嗲」，本身在傳統家庭長大，常常吸收負面說話，她不想女兒也重複舊路，所以不做怪獸家長，「我哋好relax，佢會碌地沙碌大，我由佢，唔會跌得死就OK。」唯一最怕是女兒不開心和失去學習興趣，「佢有講過返學好悶，學中文字好難」，面對香港填鴨式教育制度，Sarah可做的是讓寶貝盡情發揮小朋友的童真，做個有愛心的人：「你睇到佢變成點樣嘅性格、同人相處、做人態度，會覺得好欣慰」。
二）4歲人仔已懂駁嘴，16歲的半成年人會否容易一點相處？做人阿媽28年的何太說，「青春期（教女）難度真係最高」，她生了四個女兒，三女詠儀今年16歲，最小的女兒也13歲了，管教青春少女經驗豐富，為何她這樣說？「細個又擔心佢唔大，大咗又擔心佢唔聽話，好難教，永遠都要擔心佢」。
「佢有佢思想同主見，佢覺得阿媽咁教唔啱，一時諗唔通會嬲」，例如簡單吩咐女兒做家務，二人也可以演變成大吵。詠儀說，知道媽媽疼她才「鬧得勁」，那麼你和媽媽吵甚麼？腼腆的她一時想不起來，但何媽媽說，生活上的鎖事最容易起爭執，這次心結解開了，不久又會重演，下次再發生爭拗「佢又唔記得啦，佢又要嬲阿媽啦！」何太笑說。
「有時生活中有啲問題冇想像中咁好」，作為母親，她寄語女兒小心認識朋友，那麼會否擔心她結交男友：「會㗎會㗎！唔知出面啲人點，唔知好人定壞人」。
三）中學生不應談戀愛，不過年紀增長，沒有戀愛的孩子又惹起媽媽的焦慮。25歲的阿Yo是家中獨女，Yo媽對這粒女讚不絕口，外向又乖巧，從來不需要父母擔憂太多，不過阿Yo踢爆媽媽緊張大師的一面：「夜晚有時同朋友太夜返去，佢會whatsapp我：『喺邊呀？返嚟未呀？去到轉車站whatsapp我喎！』有時太夜會叫佢不如瞓先，一開門就見到佢瞓喺梳化。」媽媽解圍說：「我哋間屋細吖嘛！梳化行返房都係兩步啫。」阿Yo指明白媽媽是擔心她才這樣做，不過媽媽現在有另一樣更擔心的事。
「佢仲未拍拖！」但語畢又指「咁都冇得擔心嘅，緣份到就到，希望佢第時識番個好男仔啦！要識番個尊重你、愛你、有責任感嘅男朋友。」她希望母親節禮物是阿Yo帶男友回來，不過深瞭媽媽心事的阿Yo笑道：「太快（到母親節）啦！搵唔切！」
四）由拍拖到結婚再到生兒育女，30歲的Jaclyn已是兩女之母，外孫女活躍好動交由婆婆Anne每星期照顧兩天，做人母親甚艱難，Anne說最難是如何與女兒交心，即使到Jaclyn結婚生女，「宜家唔係憂佢嘅生活，而係佢將來可唔可以快樂呢？佢識唔識教個女呢？佢會唔會好辛苦呢？因為佢要兼顧湊女又有自己工作。再嚟係佢分配嘅時間啦……」
雖然做母親的資歷比女兒深，但Anne說「唔可以直接幫佢」，因為即使她已為人母，也有自己的摸索階段學習當媽媽，「係摸索中我幫咗佢，佢反而冇機會去處理學習。其實做媽媽都幾矛盾，你知道你要放手，但放唔放到又係另一回事。」
Jaclyn直認媽媽的擔心不無道理，「唔係（過慮）㗎，真係憂㗎！」不只是結婚牽連兩個家庭，還有最親密的心事只可與最親的媽媽分享：「係媽咪先可以咩都講，底嗰浸揭開晒都係可以，因為佢一定包容我」。
五）70歲的徐太扶住快將93歲的媽媽鳳蘭，一步一步走下梯級，步向花園坐下與記者細數婆婆當媽媽的歲月。為了家庭鳳蘭放棄護士工作全職照顧家庭，生了5個兒女，子女都已60、70歲，連他們也當了祖父母，鳳蘭卻說，在她眼中，仔女永遠是小朋友。
「湊仔梗係難啦！你未嘗過嗰啲味道，你唔知㗎啦！」雖然年屆九旬，鳳蘭仍然精靈，回想湊仔往事侃侃而談：「你要時時教佢做個好人，唔好結交唔好嘅朋友。遇著唔好嘅朋友仔，要帶返嚟畀我睇過……」可是子女都變公公婆婆了，還需要擔心？「擔心㗎！養兒一百歲，長憂九十九，希望佢哋身體健康。（自己呢？）梗係擔心佢多啲！自己有乜所謂啫！」女婿和仔女常常問她要甚麼，「（其實）少少嘢我都好開心，畀咩我都鍾意，畀條咸水草我都鍾意，真㗎！總之佢開心我就開心。」
記者袁楚雙
攝影李錦鏵、彭志行、何建忠
鳴謝
費利亞一家，野孩子是怎樣煉成的？
何思諺
Yo!'s Playground
兩母女手作
海恬護老院
新聞類別
港聞
詳情#
回應 (0)
