【網民hot talk】祝母親節傷心　囡囡咩事咁怨恨？

【蘋果日報】今個星期日就係母親節，相信唔少媽咪都會期待仔女好好孝敬一下，但竟然有小朋友係母親節心意卡上面寫上「惡毒的媽媽，祝你母親節傷心」，究竟咩事令到佢咁嬲媽咪呢？
有網民喺「不願小朋友成為功課奴隸fb群組」上載喺長沙灣廣場母親節展覽見到嘅心意卡，上面寫住：「惡毒的媽媽，你天天叫我溫書，我恨你！祝你母親節傷心！女兒XXX上」。不少網民都感嘆小朋友面對龐大嘅學業壓力，對敦促溫習嘅父母親產生咗恨意，深深影響親子關係，認為係香港先會有嘅情況。有網民就撐個媽咪，認為望子成材不無道理，「都係為佢好，見到張卡應該好心痛」。其實冇咩緊要過親情，喺學業同休息間係應該取得平衡，小朋友都應該體諒下父母親嘅苦心，希望佢放低恨意，好好同媽咪過個溫馨母親節啦！