智取大市：重返坐定定日子

【蘋果日報】恒指喺一片睇淡嘅風聲之下連升4日，亦連續4日升股多於跌股，雖然命中率增加，但呢幾日個股升勢並非全面，單日升市往往有強勢股、大價股要回吐。不過，通常強股弱咗兩三日又會重拾雄勢，有點兒回歸舊年大部分時間嘅方法。唔使出入咁多，坐定定仲好，寧願放棄驚人刺激嘅波幅。如果閣下個portfolio保持大漲小回，同時你唔需要緊張到不停望實報價機，就證明一切步入正軌。
上一期解釋過，點解市況、成交唔活躍，係因為重磅股展望普遍唔樂觀，加上北水亦唔會一時三刻變得非常踴躍。跌幅較深、蟹貨重重嘅股份不宜撈底，因為呢種環境資金只會取其易，先攻下容易賺錢嘅地方，去到市況反彈到八八九九時，先會有人留意追落後機會，呢一刻有排未去到呢個stage。以二三線股計，由高位跌三成或以上嘅股，基本上暫不考慮。
賭股沉寂一排，但有見濠賭數據最近月份表現唔錯，只要未見到中央有打壓迹象，喺冇蟹貨之下，股價要突破難度不高，其中金沙（1928）喺呢個板塊沉寂期間仲可以keep住喺高位，而之前強勢嘅新濠（200）就回吐幾日，整固理應差不多，都可以考慮吸納。
晉佳
http://fb.com/advanceguy1
本欄逢周一、三、五刊出