中環在線：王冬勝變恒生綠葉

【蘋果日報】恒生（011）噚日舉行股東會，舊年開始接棒嘅「一姐」CEO鄭慧敏（Louisa），同「二姐」零售銀行主管關穎嫺（Margaret）齊齊選入董事局。舊年恒生業績唔錯，加派息之餘股價仲破晒頂，在場小股東似乎幾滿意，兩位阿姐有實力之餘又省鏡，贊成票成99%。
至於在董事局代表滙控（005）、被董事長錢果豐形容為「綠葉」嘅王冬勝，似乎吸引力就唔及兩位「小花」，今年有成14%股東反對佢連任。唔通恒生小股東都係鍾情女將？定係覺得滙豐對恒生唔好啊。
另外，喺恒生做咗三年獨立非執行董事嘅新世界（017）主席鄭家純，就宣佈退任恒生董事，話有更多時間專注發展私人業務。
李華華
LiWaWa@AppleDaily.com