中環在線：嘉道理向小股東say sorry

【蘋果日報】經營半島酒店嘅大酒店（045），噚日股東會上管理層罕有地被小股東連番質問。事關大酒店股價近年冇乜起色，第一個股東詢問管理層會唔會回購股份刺激股價之後，接二連三有股東表達不滿，最後主席米高嘉道理仲要向一位小股東say sorry！
行政總裁郭敬文噚日多番強調公司睇長期回報，有位股東反駁：「人嘅生命唔係無限！」，另一股東又加入戰團話：「我70年代開始投資，全部都係藍籌，計埋股息其他都翻晒本，係呢隻（大酒店）唔夠冚（未能回本）！」，郭敬文重申，公司講求長期回報，每個酒店項目回報「起碼考慮30年以上」。
同一名股東再次舉手發言期間，嘉道理就話，為免阻住其他股東「食lunch」，歡迎該股東寫低訴求。誰不知又再引來另一名股東投訴，話自己曾入住曼谷半島酒店，不滿酒店穿梭船隻船員嘅服務，曾經直接去信嘉道理，但就得唔到回覆！嘉道理聽畢向該股東致歉。
李華華
LiWaWa@AppleDaily.com