魚樂無窮：恒生200元未算高

【蘋果日報】明星新股平安好醫生（1833）極速穿底，看似意外其實不然，講過好多次，新股首日開市價與暗盤價比較，可預示其日後走勢。
熱炒新股如賓士（1705）、毛記葵涌（1716）暗盤喪升，但翌日開市再挾高一浸，結果升得有幾誇張，相信你仲清楚過我。反觀雷蛇（1337）、易鑫（2858），開市價較暗盤價低，最後難逃潛水命運，至今仍未翻身。下次玩新股時，記住留意呢個細微位。
滙控（005）公佈首季業績，稅前盈利倒退之餘，回購額度更只得20億美元，較市場預期遜色，股價上周五一棍殺落。咁究竟買唔買得過？之前接受本報訪問時都講過，買滙控主要為收息，最新股息率超過5厘，爆升未必有佢份，但現水平有一定承托力，有中長線持貨能力的，自己計算股息率入場。
相對大笨象，佢個仔恒生（011）驚喜更多。第一次中期息由1.2元增加至1.3元，唔好睇少呢一毫子，去年首季由1.1元加至1.2元後，股價即從150元水平喪升至最新200元，犀利！今次又會升到咩位？簡單計計數，首三季共派息3.9元，假設今年末期息加至3.4元，200蚊計息率有3.7厘，絕對有能力更上一層樓！
唐牛
http://fb.com/tongcow88
本欄逢周二、四刊出
唐牛