中環在線：嘉倩BB做網絡保安KOL

【蘋果日報】大台主播紛紛出外搵食，講到近期最紅，一定係嘉倩BB。又過檔對家電視台節目做主持，又拖凸肚男友出街。今次又有新搞作，繼上次扮報新聞宣傳靈芝孢子之後，今次再做「網絡安全」KOL，網上教大家資訊安全。
嘉倩BB噚日出席活動時指，喺網上成日都收到不明人士嘅私訊，但都畀佢一一拒絕：「好似email同我講中獎，每日都收到，點數卡都時有發生。但最誇張係成日都有人撞我電郵密碼！」嚇得佢經常更改密碼。
今次安領國際（8410）同本港IT資訊平台wepro180合作，邀請嘉倩BB拍「wepro教室」，安領主席廖銳霆就話，成個project用咗6位數，見反應好，有意再添食，仲大讚嘉倩BB記嘢快，好快就拍晒20集節目。嘉倩BB就謙虛話其實用咗好多時間記稿，有興趣拍part2。
李華華
LiWaWa@AppleDaily.com