中環在線：羅康瑞開班　練功治頸痛

【蘋果日報】財經界嘅武林高手，除咗「大隻佬」股評人郭思治同埋國藝娛樂（8228）冼國林外，大家未必記得起瑞安房地產（272）主席羅康瑞亦精通古代流傳至今嘅「練功十八法」，佢仲即將開班教記者，原因係大家經常頸梗膊痛！
啱啱過咗70歲嘅羅主席，多年前有嚴重頸椎痛，郁親條頸都痛苦不堪，不過之後喺上海得到朋友傳授醫療保健操「練功十八法」，而且佢堅持每日練習10分鐘，最後竟然不藥而癒，非常神奇。
羅主席亦都知道記者成日撳電話、睇文件，成日會遇到頸痛問題，身同感受，所以佢就想將呢招傳授畀人，就同香港記者協會喺下月2日搞咗場1.5小時嘅練功班，不過就不設錄影嘅，即係羅主席嘅運功英姿，只能夠當日閉門觀賞同參詳。
李華華
LiWaWa@AppleDaily.com