王綺琴爆患「腦血瘤」：都算好彩可以做微創

【蘋果日報】現年53歲嘅大台藝人王綺琴，早前喺《平安谷之詭谷傳奇》演「樹根嫂」深入民心，開始多咗觀眾認得佢。不過昨日有報道指佢患上腦動脈血管瘤，俗稱「腦血瘤」，呢個病可大可小，所以王綺琴聽醫生講，入院做切除手術，仲用咗半年時間休養。
《蘋果》問番王綺琴，佢話：「係舊年年中嘅事，我搭飛機返香港，飲完杯香檳之後暈咗，空姐拍醒我嗰陣，我已經失禁！落機之後我睇醫生，醫生叫我照下個腦，點知就發現有個4mm嘅血管瘤。跟住8月我就做微創，現在冇事啦。我都算好彩，可以做微創，唔駛開刀，其實嗰次暈低，同血管瘤無關，都唔知道嗰次暈嘅真正原因。」
綺琴話因有事，所以舊年《逆緣》有個角色要佢攞刀斬人，佢都唔敢拍。不過早排已經開番工，拍完潘嘉德監製嘅《好日子》。