智取大市：股市的期望管理

【蘋果日報】星期一恒指無啦啦爆上，有一個未算太好嘅現象，係升勢太集中藍籌股。坊間唔少分析講到恒指能否突破三角形阻力線屬關鍵，但實情係所謂三角形參考性不大，原因係三角形形態運行得越耐，阻力線同支持線收得太窄嘅話，準確度會隨時日降低。
執筆時美股周一先升後跌，其實仍維持Chok市，低吸先係王道，而唔係所謂突破三角線阻力先去追入。
本周聯儲局議息結果只能視為股市試水溫，美國貿易代表訪華先係主菜。假如周五之前港股一直反彈，市場反映咗對談判嘅期望，無論談判結果如何，及後都有機會出現消息後短暫出貨，呢類消息絕對令過程變得風高浪急，就算中短線投機性睇好港股反彈，都要先預備過程中急Chok將會不斷持續。
首季業績走樣股份重創，包括比亞迪（1211）、兗煤（1171），內銀股盤數有得睇等於冇得睇，反而令相關股份變數減少，加上資管新規力度比預期細，令內銀短線加入成為安全板塊，而偏離貿易戰風眼嘅恒生（011）、中銀香港（2388）都成為反彈浪主力。
回顧2000年科網熱潮後嘅恒指大反彈重返高位，資金由科網股轉炒紅籌股，相信今次情況相若，上一浪嘅主力股份騰訊（700）、平保（2318）等等，相信會變得落後。
晉佳
http://fb.com/advanceguy1
本欄逢周一、三、五刊出