滙控小股東心聲：小斯冀重返紅底股

【蘋果日報】90後的小斯是「信用卡達人」兼網紅（KOL），前年英國公投脫歐後，在40多元價位撈底購入6手滙控（005），他說「想買返有啲增長得嚟又有股息收嘅銀行股」。
他不諱言以前都有覺得滙控是老人股，但近年見股價跌到差不多，亦覺得集團近年「都真係有做嘢嘅」，如裁員節省成本，搞PayMe等金融新科技，股價比前年低位時翻了一倍，「所以都對呢隻股有希望」。
由於他買入滙控的平均成本價偏低，後來在80元雖曾添食賬面坐艇，但整體計收息夠冚有賺，他指除非重見紅底，否則不考慮放售。
80後憧憬受惠加息
80後從事教育行政工作的黃沛揮，去年底以79.6元作價購入兩手滙控（005），是首度涉足投資大笨象，他個人不是經常買賣股票，但本身亦持有煤氣（003）及騰訊（700），過去曾買過中行（3988）。
滙控近年股價表現唔算標青，80後的黃生為何「唔嫌老」買滙控？他說一來有息收，二來主要睇股價，市場憧憬加息效應，「嚟緊6月美國加息，相信香港亦會跟。」所以覺得滙控值得投資及繼續持有，暫時心水價是「去到85元或者會放」，但總之睇完加息後股價表現再決定。由於資金所限，他說暫未計劃再加碼。
唐牛讚股息比率高
70後投資專欄作家唐牛，人生第一次買股票經驗「就係畀咗滙豐嘞」，他回憶是2000年約90多元買入，殊不知一買即跌，於是股價一回升至90元即平手離場，但沽貨不久大笨象又回升至100元。
多年來他都有買有賣，最近一批滙控是去年約70多元成本價買入，目前持股約10手。
唐牛認為投資滙控「係睇住股息率做人」，無論業績有無波動，「揸住滙控起碼有5厘股息收，我覺得舒服啲。」
季績臨近，他說最緊要都係睇回購。另一關鍵是北水掃貨，因平保（2318）隨時再買貨變第一大股東。