中環在線：羅康瑞10蚊開班教養生？

【蘋果日報】「上海姑爺」羅康瑞一直養生有術，就算做瑞房（272）主席兼貿發局主席，仍然精力充沛，今個禮拜連踩菲律賓同印尼兩個國家宣傳一帶一路都冇有怕。翻查資料，原來佢上周三（18日）係70歲大壽，轉個頭就出差，真係要講聲生日快樂，兼寫個「服」字畀佢。
究竟羅康瑞點樣養生嘅呢？原來近年佢興玩「練功18法」，好多年前就係憑呢個神功醫好頸椎痛，佢同華華講話：「如果唔係我點會70歲咁好體力啊？」
不過下年6月羅康瑞主席任期屆滿，仲續唔續任呢？佢就講返句「我真係多謝你啊」，原來依家主席日日都好多會開，兼且夜晚12點仲會收電話，佢都話想退休享受吓人生，而且唔會嫌悶，因為可以開班教「練功18法」或者詠春，最多收平少少，10蚊一堂，華華耐心等待主席消息。
李華華
LiWaWa@AppleDaily.com