中環在線：中銀科學園分行sell「智能」

【蘋果日報】政府近年大力鼓勵創科發展，各間銀行都搶佔箇中商機，就好似滙豐（005）、渣打（2888）先後喺科學園開分行，幫手初創及創科公司做貸款、諮詢咁，中銀香港（2388）都加入戰團，噚日佢哋喺科學園銀行服務中心正式開幕，呢間分行主要sell「智能」，點智能法呢？
首先就有中銀「至尊客服」24小時視像銀行服務，同客戶溝通，夜媽媽先嚟理財都無問題；分行又採用開放式設計，有別於一般要坐定定、等人serve你嘅分行，最特別可以話係，分行入面擺咗部由商湯研發叫「Sense Me」嘅面部分析機，只要企喺大熒幕前，望住部機兩秒，佢就會評估你嘅年紀、性別、吸引度，甚至配對埋跟你似樣嘅名人，可惜噚日現場太逼人，華華就見唔到我哋嘅創科局局長楊偉雄似邊位名人喇。
李華華
LiWaWa@AppleDaily.com