【我要坐頭等】直擊新航頭等艙！靚靚空姐隨時serve

【蘋果日報】去旅行去得多，經濟艙、特選經濟艙相信大家都坐慣坐熟，商務艙未坐過都見過，但頭等艙就掂都未掂過，除咗價錢同經濟艙差幾倍，到底有咩咁矜貴？
以新加坡航空來往香港及新加坡航線為例，商務艙價錢約1萬元，但頭等索價25,122至27,963元，價錢相差一倍有多。
今年成立六十周年的新加坡航空，A380機型將推出四款新設計機艙，其中頭等套房位於機艙上層，由舊機型的12間套房大幅縮減至6間，面積由30呎增至50呎，跟時下新盤間房差唔多。仿傚酒店房設計，靠邊是一張反床，唔瞓可以收起，空間更大。如預訂兩個機位只需拆板就可將兩間房二合一，單人床更可變雙人床。
每間套房備有兩個衣櫃位、32吋高清電視、一張反床及21吋的皮椅，可270度旋轉，方便乘客轉去睇電視及梳化。個人護理用品方面，不論睡衣、拖鞋、棉被、枕頭、及梳洗包內的各式用品，一律為Lalique的出品。
雖然廁所是共用，但6間套房有2個廁所，入面有埋梳妝台，而且空間感十足，做掌上壓都冇問題。
不過，並唔係所有航線都有頭等艙，目前只有來往新加坡及香港、新加坡及悉尼、新加坡及倫敦三條航線，才可享用新加坡航空頭等客艙服務。