謝安琪預告今年出碟

【蘋果日報】謝安琪（Kay）與王君馨昨日現身中環的唇膏活動，搽上鮮艷紅唇的Kay被問到老公張繼聰會否讚她唇靚，她笑言：「佢好難唔讚賞，佢最初鍾意我時，我箍緊牙，佢都估到我個嘴係一個重點。」Kay更透露下月開始錄音：「Juno（麥浚龍）成日同我開會，預計今年內會出碟，如果出唔到係Juno問題。」再問到會否今年開騷，她表示不少單位找她及Juno：「自己想年底發生，我都想睇Juno開騷，佢成日同我爭歌，例如有啲歌畀我，佢又話我夠歌，最終都係我爭贏。」
此外，王君馨以一身輕露事業線吊帶服飾示人，她揚言婚後都要保持身形：「我老公都好靚仔，日日都健身，我都想夏天操多啲肌肉，pat pat翹啲，着衫都靚啲。」對於好姊妹苟芸慧今年出嫁，她表示成班人妻已應承做姊妹，不過未知婚期。
採訪：黃曉妍
攝影：陳慧安