中環在線：港人網購愛買即食火鍋？

【蘋果日報】網購已成常態，但實際數據又有幾誇張？天貓超市國際化及新零售業務負責人劉文博噚日透露，佢哋網店女性用戶較男性多一倍，25至35歲消費者佔比超過15%，舊年雙11，香港單日就有超過1萬張定單。
天貓超市喺香港發展剛滿一年，劉文博話，早前海底撈搞咗個促銷活動，結果即食火鍋喺香港銷量急升6.5倍，佔全國銷售17%，佢仲話，以單一市場計，銷售佔全國近兩成係十分之誇張，可見港人有幾咁鍾意呢類即食火鍋。
劉文博補充，唔少客人對香港本土品牌嘅需求越嚟越高，超市會積極推動同本地品牌合作。家陣港人轉化率（即實際購物人數，佔到網站人數比率）係開店初期嘅6至8倍，顯示港人越嚟越鍾意網購。
李華華
LiWaWa@AppleDaily.com