【馮仁昭四圍超】母愛氾濫迪士尼巨肚吳雨霏吸正能量

【蘋果日報】現年31歲吳雨霏（Kary）有咗差唔多7個月，依家停工養胎嘅佢，前日大住個肚做善事，帶咗一班嚟自蒙古嘅中學生到香港迪士尼樂園玩，希望佢哋得到更多正能量。
衝去搵Iron Man
身為迪士尼粉絲嘅Kary，一入場就帶學生同偶像Iron Man合照，仲輪流同Iron Man玩擊掌，搞到班男同學特別興奮。之後Kary帶大家到「加利布尼市集」，又同路易王（King Louie）會面，童心未泯嘅Kary仲擺搞鬼甫士同猩猩合照，玩得好開心。不過因為大住個肚，Kary就冇陪學生玩機動遊戲。
Kary話細細個已經好鍾意貝兒公主，今次喺樂園見到另一位公主Moana，Kary即刻模仿Moana嘅招牌動作，雙手叉腰側身企，晒7個月巨肚，睇落佢個肚好圓，唔知係咪陀小公主。噚日Kary仲喺社交網留言：「好多小朋友都係第一次出國，見到佢哋玩得咁開心，我個心都融咗。」
撰文：馮仁昭