《天作之盒》導演懷念殉職醫生謝婉雯香港女兒　黑暗中燃希望

【蘋果日報】香港沙士期間有很多英雄，謝婉雯醫生是其中之一。2003年3月謝醫生走入人手短缺的隔離病房，替沙士病人插喉時染病，延至5月13日凌晨4時在屯門醫院逝世。她的事迹觸動全港市民，也觸動了導演關信輝，他在翌年找來蔡少芬飾演謝醫生，拍成了電影《天作之盒》，紀念這位香港女兒。
記者：張俊銘
15年前一場沙士疫症，於香港共奪去299人性命，其中有6名醫護人員殉職。首批甘冒生命危險自願走入沙士隔離病房之一的內科醫生謝婉雯，成為首名殉職公立醫院醫生。
「原來世界有英雄」
當年港府公佈謝婉雯死訊，全港市民哀慟，導演關信輝日前接受訪問，重提當日聽到這個消息時，仍忍不住灑淚：「當時我係做緊電影《雙雄》嘅編劇，全香港市民都唔係好敢出街，我哋做電影就日日都要出去拍嘢，正當我喺車上等候拍攝嘅時候，就聽到呢個消息，我真係忍唔住喊咗出嚟。我哋拍嘅係英雄電影，原來呢個世界真係有英雄，我同自己講無論如何一定要將呢個故事拍出嚟。」結果一年後，以謝婉雯醫生為藍本的電影《天作之盒》面世。
關直言希望用電影記錄這個故事，目的不是要找出歷史過失，因此沙士劇情於片中所佔篇幅不多，電影目的是要還原謝婉雯這個人物的事迹，英雄其實與普通人一樣。謝的丈夫也是醫生，在沙士前因血癌離世，關信輝說：「我做資料搜集時，好記得謝婉雯嘅醫生丈夫喺血癌復發時，曾經同佢講咗一句『上天留你喺世上，梗係要做一啲事』，佢先生要離開，好似將功力傳授咗畀謝醫生，留畀佢一個使命，叫佢唔好放棄唔好氣餒。就係因為呢句話，令謝醫生有勇氣去戰鬥。生命長短有時好難去度，但謝婉雯醫生嘅影響力好大，佢唔係代表一個人，而係代表住一班醫護人員嘅英雄故事。」
當年醫護設備不足，香港人陷入恐慌之中，每一日都像在打仗。關信輝認為如今香港人的衞生意識有所提高：「沙士之前，啲人戴口罩會俾人當係怪物，依家好平常，呢啲都係進步，當然我哋亦唔可以忘記教訓。」
15年過去，這一代人都因為沙士有了一個共同回憶，雖然悲劇發生了，但當時能跨過，今天都終必跨過，「回望沙士，縱使有黑暗，人性嘅光輝可以一齊照亮黑暗嘅歲月，我希望透過電影、影像可以將謝婉雯嘅故事延續開去，畀更多人去紀念呢個不死嘅精神。有危機嘅時候就有英雄出現，唔係佢哋有超能力或者有個人之長，而係可以喺逆境之中帶畀人希望嘅，就係英雄。」
如果謝婉雯仍然在世，關相信面對近日的流感疫情又或其他疾病，她仍然會當仁不讓，第一個衝向危險，「當時第二啲國家嘅醫生，聽到沙士即刻爬窗走，唯獨香港嘅醫生醫護人員留低，留守崗位就帶到別人希望，連醫生都逃走嘅時候，呢個世界就玩完」。
場地提供：The One L19 Harlars