與夫病房一巷之隔　再會竟親睹拔喉康復者失摯愛　「遺憾未說我愛你」

【蘋果日報】「每日醫生巡房就如審判，究竟係有期徒刑、無期徒刑，定係死刑？」61歲的沙士康復者陳碧君，2003年與丈夫同染沙士，每日與死神搏鬥，遺憾丈夫離世前，無法跟他好好說一句「我愛你」。在絕望邊緣，幸得女兒每日託護士送來的支持信，成為她撐下去的動力。回想沙士一役，她感觸良多，寄語大家：「幸福唔係必然，最緊要活在當下！」　
記者：郭美華　張　軍
被沙士奪走丈夫的陳碧君，事隔15年仍歷歷在目。2003年3月，丈夫在爆發沙士的淘大花園當裝修工，一天他突高燒不退，醫生朋友着他入院，惟丈夫執意認為無受感染：「聯合醫院咁多沙士病人，我冇感染都俾佢哋傳染啦，你咁樣即係逼我去死箒！」這句話至今在陳碧君腦海揮之不去，後來醫生朋友專程載他入院，「我仲記得出門口嗰陣，我叫丈夫記得帶毛巾，但佢頭也不回就直接上車，估唔到呢一次竟然係我哋有意識下最後一次見面」。
「每一日都係賺返嚟」
丈夫於3月28日入院，即時確診感染沙士，在瑪麗醫院B6病房隔離。數天後，陳碧君亦因發高燒自行到瑪麗急症室，也確診感染沙士入住A6房，「跟丈夫只相隔一條冷巷，兩道門，以為可互相照應，結果卻如牛郎織女，根本無法相見」。
入院後，陳碧君不但要服食抗病毒的利巴韋林，還要吊鹽水，「將冰凍液體打入血管，成個人打晒冷震，一支接一支，服藥後冇力落床，嚴重肚瀉，連姑娘都攞唔切尿兜畀我，後期更呼吸困難要用氧氣機，簡直成個廢人咁」。痛苦承受了，但入院一個月病情毫無改善，「試過（愛滋病藥）蛋白抑制劑、香檳療法都全無進展，每日就如白老鼠般試藥，每次都要簽生死狀，連醫生都唔知點醫我」。每天望天打卦，但她更擔心丈夫情況，以及兩名當時僅21和15歲的女兒會否受感染等。
4月28日丈夫離世，令她跌入谷底，「我睇住佢拔喉，但佢已冇晒心跳，我從冇諗過佢會死，以為大家可以一齊出院，我哋又冇做錯事，身體又好，點會死？」二人入院後只見過兩次，一次是丈夫轉往深切治療部，另一次就是拔喉一刻，兩次丈夫都處於昏迷狀態，「結婚22年，我好後悔連一句『我愛你』都未同佢講過，係我人生最大嘅遺憾」。
喪夫之痛，令她一度氣餒，幸醫生用類風濕性關節炎藥物，終令其病情好轉，她開始嘗試落床，一步一步走路，每日用水樽當啞鈴練舉重、深呼吸，留院個半月終可出院，惟體重少了16磅，更面對骨枯、氣喘、抑鬱等後遺症，至今仍要定期覆診，「雙膝經常痛楚，有時痛到瞓唔着、氣喘、唔夠力，連換一張床單都做唔到」。
撿回性命令她樂觀面對人生，「每一日都係賺返嚟，要更加珍惜，幸福唔係必然，要見嘅人、要說嘅話應該即刻去做」。