黎明打破「天王生女」局？麥玲玲：女仔係佢命中貴人

【蘋果日報】四大天王中郭富城、劉德華同張學友都係生囡囡，前日黎明都親認就嚟做爸爸，有指女助手Wing已懷孕六個月，更盛傳呢胎係生女，即係如果黎明都係生B女，四大天王就會升呢變「四大岳父」。唔知黎明會唔會意外地一索得男，打破「天王生女」嘅局面?!


對於盛傳四大天王都生囡囡，原來外父相有樣睇，堪輿家麥玲玲接受《蘋果》電話訪問表示：「四大天王由出道開始已經大受歡迎，粉絲以女仔比較多，好明顯佢哋無論命格同樣，女仔都係旺佢哋，所以邏輯上生女機會高啲；就算睇樣計，除咗黎明之外，郭富城明顯耳珠比較大，雙珠朝口，女仔係佢命中貴人，由出道嘅小美、身邊女性、女粉絲、囡囡都係旺佢嘅，華仔亦都係好大耳珠，學友都係，黎明就唔算係，因為佢耳珠飛輪反廓，但係睇番黎明本身，就算生完囡囡之後，之後有機會追到囝囝，城城都係一樣。」