8A病房女醫生學懂：對生命更堅持

【蘋果日報】「我仲記得index patient（源頭病人）係喺後街左手邊窗口位」。人稱「多多醫生」的兒科專科醫生譚婉珊，2003年時正就讀中文大學醫科五年級，因上課經常出入威爾斯親王醫院8A病房，當傳出病房爆沙士要封閉，越來越多人感染，「真係驚！成日入8A好high risk，唔知自己中唔中（沙士）」，幸她未有感染，但疫症擦身而過，見證醫生的偉大，令她深切體會到醫生並非一份普通職業，對生命更加堅持。
同學隔離留醫「先識驚」
譚婉珊憶述當年要分組跟醫生到病房學習，她恰巧被分到8A、8B病房，沙士爆發前的一段時間，幾乎日日到8A病房看病人。「突然話好多人肺炎，跟住就話要封ward（病房）」，之後威院封急症室，「嗰時先知大件事，醫院氣氛好緊張，我哋都好緊張」。
作為學生，譚稱當時未能掌握太多事態，「對面房女同學病咗入院，去探病都冇戴口罩，因為未知係沙士」，之後發現為非典型肺炎，同學轉到隔離病房留醫，「我哋先識驚」。亦有同學嚴重到要入ICU要插喉，「當時以為佢唔得，好彩最後好返畢業做到醫生」。
後來找到8A源頭病人，「即刻諗有冇睇過嗰個人……我記得佢（病人）係瞓喺後街左手邊窗口位」。她解釋，8A病房有4個病格，近門口左右兩個叫「前街」，經護士站再入的兩個叫「後街」，「其中一個中咗沙士同學，應該係上堂有聽過（中招病人）個肺，咁就中咗」。
沙士疫情蔓延全港，醫學院停課，「唔敢返屋企」。她表示，當時無向家人說入過8A病房，無謂令他們擔心。她一直留在宿舍埋首溫書應付5月的畢業考試，「嗰時仲係ICQ年代，冇得上堂，有外科教授好好，用ICQ tutorial。」那位教授就是現時中大醫學院副院長、外科學系吳國偉教授。
醫生非只係逗份人工
那年考試亦不能用真病人讓醫學生檢查診斷，改為健康人士扮演病人，口述病情由學生評估；譚亦指，2003年畢業那年，好像沒有影班相、沒有畢業聚餐，畢業典禮是醫科獨立行禮。
廿歲出頭、醫生也未做，就已經遇上如此巨大疫症，譚婉珊表示，深切體會到醫生並非一個普通職業，可以有好高危險性，「唔係只係逗份人工，唔係出面見到高薪厚職嘅一件事，係承擔咗一個社會責任」。譚婉珊亦首次感到死亡可以好近，考試後更買了人生首份保險，「就嚟做houseman，成日出入病房，會諗中咗屋企人點算，就買咗人壽保險，個名寫我爸爸媽媽」。
沙士15年，作為醫生當然不希望不知名疫症再臨。但譚認為，沙士永遠值得醫生從中學習及反思，「諗番當時醫生點做嘢，對病人的（醫者）心有幾大；面對咁大疫症點樣處變不驚去面對，如果再遇到又點處理得好啲」。
經歷過沙士的她，在當醫生前已體驗到生命的可貴，從事兒科曾在深切治療部工作的她指，「如見到醫生同BB抽血粗魯啲，到依家都會好『憫憎』」。
■記者嚴敏慧