前記者：前景悲觀預咗會摺

【蘋果日報】下周出版最後一期紙本後全面數碼化，多名《壹週刊》前員工均表示感可惜卻是預期之中。自創刊至2016年，其間只短暫離開3個月的前圖片編輯羅錦波，離職前負責統籌雜誌網上影片，見證雜誌走過最輝煌的時代，那些年，高質的紙本圖片故事，跨版新聞照片，終於只能成為歷史。「我離職前，攝影部同事基本上已要兼顧拍片，好多資源已去咗做網」。他直言停出紙本早有心理準備，「只係時間問題」。
現時任職自由攝影師的羅錦波，說對紙本始終有份情意結：「《壹週刊》20周年時喺時代廣場有個圖片展，展出好多靚相，都係美好回憶。」
「光榮引退好過賣盤」
他說在經歷多次大地震後，已轉職自由工作者。「雜誌唔再出紙本都冇所謂，有能力咪自己出圖片集、搞吓展覽咁囉，都可視作一種延續」，但他說明白走向數碼化已是不能逆轉現實：「其實媒體對影像要求越嚟越高，只係發放平台唔同咗。」攝影師出身的他，說不介意以攝錄方式講故事，會往前看。
早前賣盤予黃浩時選擇離職，曾在時事組任職的一名記者謂「摺書」是預期之中，她直言對前景悲觀，明白當初賣盤是逼不得已，但若員工有得選擇，寧願「直接摺咗佢」，認為「咁都勉強叫光榮引退」。「網上版《壹週刊》已營運3、4年，靠《蘋果》平台先叫多少少人睇，冇乜起色，依家好多部門外判，又要做埋即時新聞，人手唔夠只係人做我又做，數碼化後係咪就可以殺出到一條血路？係一個問號」。
■記者呂麗嬋